གཞང་འབྲུམ་ནི་ནད་ཀྱི་གནས་དང་མཚན་ཉིད་ལ་ལྟོས་ནས་བཏགས་པའི་གཞང་ལམ་དུ་འབྲུམ་པ་མང་པོ་སྐྱེས་པའི་ལྷན་སྐྱེས་ཀྱི་རྨ་རིགས་ཤིག་སྟེ། བཤང་བ་སྐམ་པའམ་ཕོ་བའི་མེ་དྲོད་ཉམས་ནས་འཁྲུ་པ་དང་སྟན་སྲབ་ཏུ་བསྡད་དྲགས་པ། ཚོ་ཆེ་བ། སྦྲུམ་མ། རྒན་པོའི་རིགས་དང་གཅེའུ་བཙན་པོ་སོགས་ཀྱིས་གཞང་ལ་གནས་པའི་ཐུར་སེལ་རླུང་གི་བྱེད་ལས་འཁྲུགས་ནས་ཁྲག་རྩ་རྒྱས་པ་དང་ཁྲག་འཁྱིལ་བ།ཁྲག་རྩའི་ནང་ཁྲག་འདྲིལ་ཏེ་གཉན་ཁ་རྒྱས་པ་དང་ཟ་འཕྲུག་ལངས་པ།འབྲུམ་པ་བརྡོལ་ནས་ཁྲག་ཟགས་པ་དུས་ཐོག་ཏུ་གསོ་བཅོས་མ་བྱས་པར་ཟུངས་ཁྲག་ཟད་ནས་སྲོག་ལ་རྒོལ་བའི་ནད་གཞི་གདུག་པ་ཅན་ཞིག་ཡིན།

        ཉེས་པའི་དབྱེ་བར་རླུང་ལས་གྱུར་པ་དང། མཁྲིས་པ་ལས་གྱུར་པ། བད་ཀན་ལས་གྱུར་པ།ཁྲག་ལས་གྱུར་པ། སྐམ་པ་དང་གཤེར་བ་བཅས་དྲུག་ལ་དབྱེ་ཡང་མདོར་ན་རླུང་དང་བད་ཀན་ལས་སྐམ་པ་དང། ཁྲག་དང་མཁྲིས་པ་ལས་གཤེར་བ་སྟེ་སྐམ་གཤེར་གཉིས་སུ་དབྱེ་བ་ཡོད་ལ།གནས་ཀྱི་དབྱེ་བར་ཕྱི་འབྲུམ་དང་ནང་འབྲུམ་འདྲེས་འབྲུམ་གསུམ་དུ་ཕྱེ་ཡོད།

     གཞང་གི་ཕྱི་ནང་འབྲུམ་པ་ཆེར་རྒྱས་ནས་བཤང་བ་བཀག་ཅིང་ཐུར་སེལ་གྱི་རླུང་གྱེན་དུ་ལོག་པས་གསུས་པ་སྦོས་བརྒྱངས་བྱེད་པ་དང་། བཤང་བ་སྐམ་ཞིང་འབྱིན་དཀའ་བ།གཞང་ཁ་གཟེར་བ། ལུས་ཙོག་པུར་སྡོད་མི་ཐུབ་པ། གཞང་ཁ་ནས་ཆུ་སེར་དང་ཁྲག་བཅས་འཛགས་པའོ། བྱེ་བྲག་ཏུ་བད་ཀན་ལས་གྱུར་ན་གསུས་པ་སྦོ་ཞིང་འཁྲུ་ལ་འཁྲུ་མདོག་སྐྱ་ལ་བེ་སྣབས་ལྡན་པ་དང་། ཁྲག་དང་ཆུ་སེར་སྤྱིར་མི་འཛག་པ། འབྲུམ་པའི་མདོག་དཀར་བ།གཡའ་ཞིང་ཟ་འཕྲུག་ལངས་པ་སོགས་འབྱུང་། རླུང་ལས་འགྱུར་ན་བཤང་བ་སྐམ་ཞིང་གཞང་ཚ་བའམ་ཡང་ན་སྐ་སླ་འདྲེས་མར་འཁྲུ་བ། མགོ་དང་བརླ་ཤ་རྩིབས་ལོགས་ཆུ་སོ་གཟེར་བ།ཁྲག་གིས་གྱུར་ན་འབྲུམ་པ་བྱུ་རུ་འདྲ་བ་དམར་པོ་འབྱུང་ཞིང་ཤིན་ཏུ་ཚ་ལ་བཤང་བའི་རྗེས་ཁྲག་མང་ཡང་ཡང་འཛགས་པའོ། མཁྲིས་པ་ལས་གྱུར་ན་གཞང་ཁ་ནག་ལ་འཁྲུ་མདོག་དམར་སེར་དྲི་མ་ཆེ་བ་སླ་བར་འཁྲུ། འབྲུམ་པའི་མདོག་དམར་སེར་ཡིན་ལ་ཁྲག་སླ་མོ་འཛགས་པའོ།

 ནང་འབྲུམ་གྱི་རྟགས་སུ་བཤང་བར་ཁྲག་འདྲེས་པ་དང་ཁྲག་མདོག་དམར་པོ་ཡིན་པ།བཤང་བ་བབས་པའི་རྗེས་སུ་ཁྲག་ཐིགས་འབབ་པ། ནད་བབས་ལྕི་དུས་ཁྲག་བཞུར་བའི་རྟགས་ལྡན་པ། དུས་ལྟར་མ་བཅོས་པར་འགོར་འགྱངས་བྱས་ན་ལུས་ཟུངས་ཟད་ནས་བཅོས་དཀའ་བར་འགྱུར་ཉེན་ཆེ། ནང་འབྲུམ་ཐོག་མར་བྱུང་དུས་གཟེར་ཟུག་གང་ཡང་མེད་ལ་ཡུན་འགོར་ཚེ་འབྲུམ་པ་ཕྱིར་གཞང་ལུག་ནས་གཟེར་ཟུག་དྲག་པོ་འབྱུང་།

       ཕྱི་འབྲུམ་གྱི་རྟགས་སུ་གཞང་ཁར་ཟ་འཕྲུག་ལངས་པ། བརླན་གཤེར་ལྡན་པ། བཤང་བ་སྐམ་ཞིང་འབབ་དཀའ་བ།གཞང་ཁ་གཟེར་བ། ལུས་ཙོག་པུར་སྡོད་མི་ཐུབ་པ། འབྲུམ་པ་ཕྱིར་ལུག་པ་བཅས་འབྱུང་། འདྲེས་འབྲུམ་གྱི་རྟགས་ནི་ཕྱི་འབྲུམ་དང་ནང་འབྲུམ་གཉིས་ཀྱི་རྟགས་འདྲེས་པར་འབྱུང་།

གསོ་བཅོས་ཀྱི་ཐབས།

༡ ཟས་སྐོམ་གྱི་བཅོས་པ། ཟས་སྐོམ་འཇུ་སླ་བའི་རིགས་དང་གར་སླའི་རིགས་བསྟེན་ལ།ཚྭ་སྒོག་དང་རུལ་སུངས་ཀྱི་རིགས་ལ་འཛེམ་དགོས།

༢ སྤྱོད་ལམ་གྱི་བཅོས་པ།  སྤྱོད་ལམ་ལུས་འཁྱགས་པ་དང་བརླན་སྟེང་དུ་འདུག་ཡུན་རིང་བ། ལངས་དྲག་པ་དང་ཙོག་དྲགས་པ། བཤང་གཅིན་བཀག་དྲགས་པའམ་བཙིར་དྲགས་པ་སོགས་སྤངས་ནས་བསིལ་དྲོད་སྙོམས་པའི་གནས་སུ་ངལ་གསོ་བར་བྱ།

 ༣ སྨན་གྱི་བཅོས་པ།

     ཁོང་དུ་བསྟེན་པ། ༡ ཕོ་བའི་མེ་དྲོད་གསོ་བའི་གཉེན་པོ་བསྟེན་པ། སེ་འབྲུ་དྭངས་གནས། སེ་འབྲུ་ལྔ་བ། དྭགས་པོ་སྨན་ནག ཤུ་དག་བཞི་བ། ༢ དང་ག་འབྱེད་པ་དང་བུ་ག་དག་པར་བྱེད་པའི་གཉེན་པོ་བསྟེན་པ། གསེར་མདོག་ལྔ་བ། ཞི་བྱེད་དྲུག་པ། ཞི་བྱེད་ཉེར་དགུ  ༣ གཉན་དང་གཟེར་གཅོག་པའི་གཉེན་པ་བསྟེན་པ། རུ་ཁྱུང་། བྱི་ཏང་བདུན་པ། འཆི་མེད་སྲིན་སེལ། དངུལ་ཆུ་བཅོ་བརྒྱད། ཁྱུང་ལྔ་། ཕན་པ་ཀུན་ལྡན།

མས་བཏང་གིས་བཅོས་པ། བྱི་ཏང་བདུན་པའི་རེང་བུ། གཞང་སྲིན་བདེ་བྱེད་རེང་བུ། 

  ༤ དཔྱད་ཀྱིས་བཅོས་པ། 

      བྱི་ཏང་བདུན་པའི་བྱུག་སྨན། རླངས་ལུམས།དྲོད་དུགས།གཏར་དང་གཤགས་བཅོས།

གཞང་འབྲུམ་ནད་ཀྱི་སྔོན་འགོག  

   འཚོ་བའི་གོམས་གཤིས་ལེགས་པོ་ཆགས་སུ་འཇུག་པ་དང་། སྔོ་ཚལ་དང་ཤིང་ཏོག  འཇུ་སླ་བའི་སོགས་མང་དུ་བཟའ་བ་དང་། ཆུ་མང་ཙམ་འཐུང་བ། རུལ་སྐྱུར་དང་ཚ་སྒོག་གི་རིགས་ལ་འཛེམ་པ། གཞང་གི་གཙང་སྦྲར་དོ་སྣང་དང་གནས་འཁྱག་སར་ཡུན་རིང་དུ་མི་འདུག་པ།ལངས་དྲགས་པ་དང་ཙོག་པུར་སྡོད་དྲགས་པར་མཉམ་འཇོག་བྱེད་རྒྱུ་དང་འོས་འཚམས་ཀྱི་འགུལ་སྐྱོད་བཅས་བྱས་ན་གཞང་འབྲུམ་མི་འབྱུང་བའི་ཉེན་ཁ་སྔོན་འགོག་དང་ཆུང་དུ་གཏོང་ཐུབ།

藏医专治痔疮医师‍